自由
自由
繼續上篇嘅寬恕,我諗我嘅思緒都係走唔出依個主題。無論係老一輩嘅六月,同我地嘅六月,都係追求緊一個字:自由。我係有啲深入啲嘅諗法,又分享一下,等上一篇關於寬恕嘅文章完整啲。
我一直對關於自由諗法都好直觀。自由,咪就係有得選擇,做決定,決定權係我手。曾經香港某政治人物都有過選舉嘅口號:「有得揀你先係老闆。」我諗我對依句都照單全收,冇深入去思考同批判過。我嘅爸爸媽咪都成日講:「你過咗十八歲喇,你有自由自己㨂啦。」六月嘅不怨,係依個基本權利被剝削,仲要日日夜夜都同你講你要臣服,唔俾你揀之外,仲要屈你食「大人」揀比你嘅野。
但係依幾年,無論係「疫情」定係其他大環境嘅改變,令我都好感受到自由嘅重要,同時覺得依個唔係一個好好嘅答案。咁自由如果似係從「我想有選擇」出發,咁好多人都會話中國香港都仲好自由呀。想買咩都有,點解自由揀領導咁重要?點解免於恐懼嘅自由咁重要?
我最近嘅感覺同睇法係:我覺得我地覺得嬲,覺得憤恨係人之常情。一個人見到人俾人打到爆哂缸,聞過當時過啲氣味,聽到對有權嘅人咁樣處理件事好有意見,甚至詛咒都唔過份。一路落嚟,對香港依個社會嘅愛冇辦法展現,久而久之,我好似對依件事習以為常。我冇諗過,咁樣其實都係一種失去自由,今次仲癲係自己俾自己嘅一個監倉:一個自己嬲、自己令自己失去同理心嘅監倉。我自己失去左前進嘅自由,我失去左見到某種人唔嬲嘅自由。一見到佢哋我就一定要嬲住咁過,就算係幾分鐘都好,我都自己令自己失去果幾分鐘嘅自由,因為我一定要嬲住過。
我變咗冇得揀,我俾佢揸住左個⋯⋯心情,仲要俾機會個心黑左,咁就係同惡魔對抗變成惡魔喇。 依種不知不覺自我設限嘅習慣,都可以話俾我一個好重要嘅嘢- identity。我如果唔嬲嘅話,我就係唔再係香港人。一諗到依到我就突然覺得好鳩。我係香港人,我應該繼續好好生活,避開邪惡,繼而好好contribute to the community,or even the world先係!最重要係,恨唔到帶來咩好嘢,唔好話咩榮光添。hate can bring no glory。因此,依種對昨日不公不義無力嘅憤恨,今日居然變成我嘅絆腳石。
That’s why I choose to forgive.我唔想俾佢啲言行阻住我進步。