生成式苦難

我早幾日聽到連開鎖佬都識ChatGPT，生成式AI依加真係大勢所趨。用左生成式AI咁耐，佢同平時啲軟件唔一樣，同樣嘅input，每一次都有會好唔一樣嘅output。咁嘅特性令生成式AI會有幻覺 ：「hallucination」－即係會產生一啲喺現實世界根本唔存在嘅「資訊」。例如我問生成式AI「行路過英倫海峽嘅世界紀錄」，有啲生成式AI會答「行路過英倫海峽嘅世界紀錄係邊個邊個幾時幾月發生」。依個答案好明顯係錯得好緊要。有趣嘅係，我發現係日常生活中，我哋嘅記憶同埋情感都會subtly發生咁嘅情況。

近來處理兩班同事嘅「不和」，發現兩邊都有啲誤會，生左啲唔知係邊出黎嘅故仔，大家仲要因為依啲故事唔開心，估對方嘅居心。估下估下再生左啲古怪故仔，跟住再相處，就再唔開心多啲。呢個時候我先醒覺，我哋嘅記憶可以好似生成式AI嘅hallucination一樣，被我哋嘅情感同主觀意識改寫咗。

喺職場上，我經歷過唔少令人困惑，甚至嬲到爆嘅時刻，依啲故仔都係我專業上重要嘅小故事。記得有份工，自己付出咗好多努力，為咗升職加薪而不斷解決手頭上嘅問題，又嘗試開展新項目，對幾個上級都表現出足夠嘅尊重同配合。但係突然間，公司空降咗一個新上司，要我去做一啲我唔覺幫到生意嘅project唔止，仲要覺得我「唔成熟」，問上司點先成熟，就當然係冇答案，令我覺得付出都白費哂。又有次見工嘅時候，自己表現得唔錯，展示出專業同能力，但最後都係石沉大海。我不斷反思，會唔會係因為自己太過自信，畀人一種唔係team player？會唔會係其實人地唔識貨？會唔會係⋯⋯？

但係依啲故事同後面嘅思考，都係我自己嘅演繹，就好似AI嘅hallucination一樣唔係百分百真實。我哋每個人嘅人生經歷都係由一個又一個故事編織而成嘅。而喺呢啲故事入面，我哋好易將唔開心、失敗嘅事怪責他人，又或者過分苛責自己。又或者倒返轉將自己成功嘅全歸功自己。一或係將一啲無關痛癢嘅事放大咗，又或者將自己唔願意面對嘅問題縮細咗。我哋花好多精力心思，去建構一個自我，等到自己好過啲。

當我哋明白到呢一點，感覺既係一種解脫。解脫嘅係，我哋唔使再被可能扭曲咗嘅記憶困擾。雖然我感受到嘅情感係真嘅，但係時日過去，依家嘅我學識用更包容嘅角度去回望過去，明白到每個人都係喺自己嘅視角講述自己嘅故事。真相可能永遠都唔會知道，咁我哋就可以選擇放低一啲唔全面嘅記憶，唔使再俾佢主導我哋。

希望大家唔好不知不覺間，俾自己hallucinate出嚟嘅故事同原因所困。

如果大家都想一齊深入探討科技同人生，都可以contact tact me. 🤙🏻