恕

六月係一個傷心嘅一個月。好多以前發生咗嘅事，令好多人一直都好多嬲，不憤，怨恨咁過。不過今年有啲新嘅諗法，分享下少少。

假設，有一件事發生左，佢傷害左我。咁多年黎，我都好嬲好唔開心咁過。可能嘅原因係，因為我覺得，如果我唔係咁唔開心，咁嬲住過嘅話，我就會忘記佢。我忘記佢，歷史嘅洪流就會沖淡佢，依件事就會被忘記。如果我唔記得，我就會係加害者嘅幫兇，因為兇手就係想我唔記得依件不義嘅事。我覺得兇手要落地獄，我唔寬恕佢嘅話，佢一定要落地獄。佢依家仲唔俾我講佢壞話，佢心虛，我要同佢作對。因此，我要嬲住咁記住佢，去證明自己係一個正義嘅人。

我覺得依啲諗法都無可厚非，不過諗真啲，依啲係唔合理嘅信念，因為邏輯上唔通。

第一：傷害係一個過去嘅自己。一路嬲住，個傷害就係一路都係到，一路傷害現在同未來嘅自己，好似打機中毒咁，日日扣血。嬲傷害嘅，仲要係你嘅心。你嘅心好寶貴，實左黑左好難好番。（遲啲可以講下黑左實左嘅心有咩唔好。）

第二：我忘記佢，同寬恕佢，係兩個唔同嘅動作。寬恕佢，係唔俾佢再傷害我。仲有，我大量過佢，我勁啲，我都唔會俾佢再傷害我。

第三：從行動推測想法，兇手根本唔想你唔記得佢，你唔見好多動作嘅咩？我估佢真心唔想。黑社會濕你一獲，日日都想你記得佢打得你咁金，要你驚。

第四：我唔可以送人落地獄，得耶穌可以判人罪。我寬唔寬恕佢，同佢落唔落地獄，係冇關嘅。（當然你大愛啲可以幫佢祈禱等佢唔使落地獄，咁就個人選擇啦）

第五：我係正義嘅人，我覺得唔係對事情有判斷同有義怒咁簡單，而係日日對人對同事對家人，有冇愛，有冇守規矩。

綜合以上各點，因此我依家嘅諗法係：如果有啲咁嘅事，我會話：當時咁做你係唔啱嘅，不過我唔會嬲，因為我以經寬恕左你。我都會記住，都會係歷史故事咁話俾人聽。